இது பயணக்கட்டுரை அல்ல - 3

செஞ்சோற்றுக் கடன்

நன்றி: http://atithisatkar.blogspot.com

“இது பயணக்கட்டுரை அல்ல” என்று இத்தொடர் அழைக்கப்படக் காரணம் ரொம்பவும் மெனக்கெடாமல் கேஷுவலாக நேரம் கிடைக்கையில் நான் எழுத வசதியாகத்தான்.

சரி, விமானப் பயணத்தை வைத்து இரண்டு அத்தியாயங்கள் ஜல்லியடித்தவன், மேலும் மொங்கான்* போடுமுன் இந்தப் பயணத்தின் அவசியத்தைக் கூறுகிறேன். யாருக்குத் தெரியும், இந்த அத்தியாயம் ‘கார்பரேட் கனவுகள் - 2” படைக்க ஒரு உந்துகோலாக அமைந்தாலும் அமையலாம் (ஈஸ்வரன் உங்களை ரட்சிக்கட்டும்).

நான் பணிபுரிவது ஒரு தர்ட் பார்ட்டி பி.பீ.ஓ. நிறுவனத்தில். பி.பீ.ஓ’க்களில் சிலப்பல வகையறாக்கள் உள்ளன. அவற்றில் முக்கியமானவை ”தர்ட் பார்ட்டி மற்றும் கேப்டிவ்” பி.பீ.ஓ.க்கள் (Third party BPO and Captive BPO). 

தர்ட் பார்ட்டி பி.பீ.ஓ. (Third party BPO)

நம் நாட்டில் பெரும்பாலும் இயங்கி வருபவை தர்ட் பார்டி பி.பீ.ஓ. வகையறாக்கள்தான். எளிமையான பாஷையில் சொன்னால் இவ்வகையினர் ஜாப் வொர்க் எடுத்து செய்பவர்கள். அதாவது விப்ரோ போன்ற ஒரு கம்பெனி கோகோ கோலா போன்ற ஒரு அமெரிக்க கம்பெனியின் வேலைகளைச் செய்ய காண்ட்ராக்ட்  எடுத்தால் அந்த வகையறா தர்ட் பார்ட்டி பி.பீ.ஓ.வில் சேரும். விப்ரோ, டி.சி.எஸ், அக்சென்சர், காக்னிஸன்ட் போன்ற நிறுவனங்கள் இத்தகையவை.

இந்தத் துறைகளில் இங்கே காண்ட்ராக்ட் என்னும் சொற்பதம் உபயோகப்படுத்தப் படுவதில்லை. அதற்குப் பதிலாக "டீல்" என அழைத்துக் கொள்கிறார்கள்.

 

"தெரியுமா, விப்ரோ முப்பது மில்லியன் நிப்பான் டீல் வின் பண்ணியிருக்காமே?", என்று யாரேனும் சம்பாஷித்துக் கொண்டால் அதற்கு அர்த்தம் இதுதான்; மூன்று கோடி வருமானம் தரக்கூடிய காண்ட்ராக்ட் ஒன்றை விப்ரோ எடுத்துள்ளது.  நிப்பான் காண்ட்ராக்டில் கொடுத்த வேலைகளை விப்ரோ நிறுவனம் இந்தியத் தொழிலாளர்களை வைத்து முடித்துத் தரும். 

 

காப்டிவ் அல்லது ஷேர்ட் சர்விஸ் பி.பீ.ஓ (Captive BPO / Shared Services)

ஒரு மேலைநாட்டு நிறுவனம் தன் நிர்வாகச் செலவுகளைக் குறைத்துக் கொள்ள இந்தியா போன்ற ஆசிய நாடுகளில் தானே அலுவலகங்களைத் தொடங்கி தன் மேலைநாட்டு வணிகத்தின் வேலைகளை இங்கு தொழிலாளர்களை வைத்து செய்து கொண்டால் அந்த வகை நிறுவனங்கள் காப்டிவ் பி.பீ.ஓ'க்கள் எனப்படுகின்றன. ஃபோர்ட், ஸ்டாண்டர்ட் சார்டர்ட், ஷெல் போன்ற நிறுவனங்கள் இந்த வகையில் இந்தியாவில் இயங்குகின்றன. 

காப்டிவ் ஆக இருந்துவிட்டு அதை தர்ட் பார்ட்டியிடம் விற்கும் பி.பீ.ஓ'க்கள் உள்ளன. தர்ட் பார்ட்டிகளிடம் தனித் தனியே தன் வேலைகளை பிரித்துக் கொடுத்துவிட்டு, இந்த வகை பிசினெஸ் சரிவருகிறதா என ஆழம் பார்த்துவிட்டு தன் காப்டிவ் பி.பீ.ஓ'க்களை ஆசிய நாடுகளில் கொண்டு வந்து நிறுவும் நிறுவனங்களும் உண்டு.  ஒவ்வொரு விதமாக வேலை கொடுத்தாலும் ஒவ்வொரு விதத்தில் லாப நஷ்டங்கள் உண்டு. தர்ட் பார்ட்டி’யிடம் வேலையைத் தந்தால் நிர்வாக சிக்கல்கள் இல்லை எனினும் நிர்வாகத் தலையீடுகளும் சாத்தியம் இல்லை. உதாரணத்திற்கு, காப்டிவ் என்றால் ஊழியர்களை நேரிடையாகக் கேள்வி கேட்க இயலும். ஆனால் தர்ட் பார்ட்டி என்றால் வணிகத்தை கவனிக்கும் நிர்வாகிகளைத்தான் அயல்நாட்டுக் கம்பெனிகள் கேள்வி கேட்க இயலும். 

(கார்பரேட் கனவுகள் புத்தகத்திலிருந்து) 

மேலே நான் அடிக்கோடிட்டிருக்கும் பகுதியைக் கவனியுங்கள். அதுதான் என் இந்தப் பயணத்திற்கான காரணம். நான் பணிபுரியும் டீல் எங்கள் கம்பெனியுடனான ஒப்பந்தத்தை முடித்துக் கொண்டு தங்கள் சொந்த யூனிட் ஒன்றை தில்லியில் சமீபத்தில் துவங்கியுள்ளது. பிரிட்டனில் உள்ள அந்த நிறுவனம், தங்கள் நிர்வாகப் பணிகளில் சிலவற்றை எங்கள் நிறுவனத்திடம் ஒப்படைத்திருந்தது. எங்கள் நிறுவனம் இந்தியப் பணியாளர்களை வேலைக்கு அமர்த்தி இதுவரை செய்து தந்து கொண்டிருந்த அந்த வேலைகளை, பிரிட்டன் நிறுவனம் தற்போது தில்லியில் தானே ஒரு சொந்த யூனிட்டை நிறுவி, அதேபோல் இந்தியப் பணியாளர்களைக் கொண்டு முடித்துக் கொள்கிறது. 

எங்கள் நிறுவனத்தின் மூலமாக கடந்த மூன்று வருடங்களாக அந்த பிரிட்டன் நிறுவனத்தின் கணக்கு-வழக்குகளை கவனித்து வந்த நான், தில்லியில் என் வேலையை கவனிக்கப் புதிதாக நியமிக்கப்பட்ட அன்பர் ஒருவரிடம் என் பணிகளை ஒப்படைக்க (Role Hand-over) மேற்கொண்டதே இந்தப் பயணம்.

ஆக, கிட்டத்தட்ட ஒரு அசுப விசிட்தான் இது. மூன்றுவருடம் மேற்கொண்ட வேலையை கண்ணீர்சிந்திக் கையைக் கழுவி, “இந்தாப்பா, வெச்சுக்கோ”, என தந்தவனிடமே திருப்பிக் கொடுத்துவிட்டு வரும் ‘ஹேண்ட்-ஓவர் விசிட்”. 

எனினும், இது என் முதல் தலைநகர் பயணம் என்பதால் பலவகைகளில் எனக்கு முக்கியம் வாய்ந்ததாக அமைந்தது இந்த பயணம். அவை பற்றி...

* (நன்றி: டாக்டர். வரசித்தன்)